លទ្ធផលហួសចិត្តដែល ខ្មែរ សុវណ្ណភូមិ ទទួល​បាន​ពីការ​ប្រកាស​ប្រកួត​ជាមួយ​កូនប្រុស​ទាំងបី​របស់​សម្តេច ហ៊ុន សែន

ស្របពេលដែលបណ្តាញសង្គមហ្វេសប៊ុកកំពុងកក្រើករឿងយុវជនសុំប្រគួតសមត្ថភាពជាមួយកូនប្រុសទាំងបីរបស់នាយករដ្ឋមន្ត្រីកម្ពុជា យុវជនអ្នកតាមដានហេតុការណ៍សង្គមនិងនយោបាយដ៏សកម្មម្នាក់ឈ្មោះ ប៉ាង សុខឿន (ខ្មែរ សុវណ្ណភូមិ) បានសម្តែងការខកចិត្តចំពោះប្រតិកម្មអ្នកគាំទ្រគណបក្សប្រជាជនកម្ពុជា ក្រោយពេលដែលខ្មែរសុវណ្ណភូមិបានប្រកាសសុំប្រកួតសមត្ថភាពកាលពីម្សិលមិញ។ បុរសរាង្គខ្ពស់មុខមាំម្នាក់នេះ បានលើកឡើងនៅក្នុងទំព័រហ្វេសប៊ុករបស់ខ្លួួនថា៖

រឿងស្មានមិនដល់៖ រឿងល្អ បែជាពួកគេគិតពីផ្លូវអាក្រក់ទៅវិញ!

នៅពេលដែល ខ្មែរ សុវណ្ណភូមិ ប្រកាសប្រកួតចំណេះដឹង និងសមត្ថភាពជាមួយ កូន ហ៊ុន សែន ទាំង៣នាក់ បន្ទាប់ពី ហ៊ុន សែន បានអួត អាងក្តែងៗថាគ្មានអ្នកណាចេះដល់កូនខ្លួនដោយសារកូនខ្លួនសុទ្ធតែជាបណ្ឌិតនោះ បែជាមានបងប្អូនអ្នកគាំទ្របក្សប្រជាជនអាចនិយាយថាអ្នកមកដាក់វាចារទាំងអស់ ១០០% (សូមបងប្អូនទៅមើលការដា់វាចាររបស់ពួកគេចុះ) សុទ្ធតែមិនយល់ថានេះជាចំណុចល្អ និងជាចំណុចវិជ្ជាមានសម្រាប់ខ្មែរជាពិសេសពួកយើងមនុស្សជំនាន់ថ្មីទៅវិញ ដោយម្នាក់ៗបែជាខំប្រឹងជេរប្រទិច ប្រមាថ មើលងាយមើលថោក គំរាមសំលាប់ និងអ្នកខ្លះតិះដៀលដល់ឪពុកម្តាយខ្មែរ សុវណ្ណភូមិ ទៅទៀត។

វាពិតជាគួរឲ្យសោកស្តាយណាស់។ តាមពិតទៅ បើ ខ្មែរ សុវណ្ណភូមិ បបួលកូន ហ៊ុន សែន ទាំង៣ទៅប្រកួតអ្នកខ្លាំងខាងបាញ់សំលាប់មនុស្ស ប្រើហិង្សា បំផ្លិចបំផ្លាញជាតិ និងលួចជាតិ នោះទើបសមនឹងត្រូវពួកគេមកជេរប្រទិច មើលងាយ គំរាមសំលាប់ និងប្រមាថកាតទាន ខ្មែរ សុវណ្ណភូមិ។ តែនេះបបួលប្រកួតចំណេះដឹងដោយត្រឹមត្រូវ និងដោយតម្លាភាពសោះ បែជាពួកគេមកប្រតិកម្មបែបនេះទៅវិញ?

ខ្មែរ សុវណ្ណភូមិ ចង់សួរថា បើមានការប្រកួតចំណេះដឹងមែន តែខ្មែរខាតឬ? ខ្មែរស្លាប់ឬ? តើការប្រកួតនេះអាចឲ្យ ខ្មែរ សុវណ្ណភូមិ ស្លាប់ ហ៊ុន ម៉ាណែត ស្លាប់ ហ៊ុន ម៉ានិត ស្លាប់ និងហ៊ុន ម៉ានី ស្លាប់ឬ? និយាយរួមកិច្ចការក្នុងរឿងនេះ បើពួកអ្នកគំាំទ្រស៊ីភីភីទាំងនោះ ស្រឡាញ់ ហ៊ុន សែន និងកូន ហ៊ុន សែន ពិតប្រាកដ ហើយជឿជាក់លើសមត្ថភាពពួកគេពិតមែននោះ ពួកអ្នកគាំទ្រទាំងនោះគួរតែលើកទឹកចិត្ត ហ៊ុន សែន និងកូនៗ ហ៊ុន សែន ឲ្យទទួលយកការប្រកួតនេះ។ ព្រោះថាការប្រកួតនេះ នឹងមិនឲ្យអ្នកណាស្លាប់ទេ ហើយទោះអ្នកណាឈ្នះ អ្នកណាចាញ់គឺវាជាផលល្អរបស់ខ្មែរទាំងអស់គ្នា ព្រោះវាជាកិច្ចការដែលបានបង្ហាញពីចំណេះដឹងជូនខ្មែរយើង និងជាពិសេសបង្ហាញពីវប្បធម៌ពួកយើងនៃមនុស្សជំនាន់ថ្មីថាចេះយកវេទិការមកអង្គុយជជែកគ្នាចៀសជាងការយកកាំភ្លើងមកសំលាប់គ្នាដូចអតីតកាល។ ចុងក្រោយ ខ្មែរ សុវណ្ណភូមិ សង្ឃឹមថាបងប្អូនស៊ីភីភី នឹងយល់ពីតំលៃរឿងនេះតាមរយៈអត្ថបទនេះ។

គួររំឭកថា កាលពីយប់ថ្ងៃទី ២៥ ខែ កញ្ញា ឆ្នាំ ២០១៧ លោក ប៉ាង សុខឿន (ខ្មែរ សុវណ្ណភូមិ) បានប្រកាសបបួលកូនប្រុសទាំងបីរបស់លោកនាយករដ្ឋមន្ត្រី ហ៊ុន សែន (ហ៊ុន មានី, ហ៊ុន ម៉ាណែត, ហ៊ុន ម៉ានិត) ជ្រើសរើសម្នាក់ណាក៏បាន ហើយចូលទាំងបីក៏បាន ដើម្បីប្រគួតសមត្ថភាពចំណេះដឹង ក្នងការអភិវឌ្ឍន៍សង្គម ដោយលោក លើកឡើងថា៖

ហ៊ានទេ?

ហ៊ុន សែន អួតសម្បើមណាស់អំពីកូនរបស់ខ្លួន។ ក្នុងន័យនេះ ខ្មែរ សុវណ្ណភូមិ ចង់ប្រកាសថា បើសិនជាកូន ហ៊ុន សែន ពិតជាខ្លាំងមែន ក្នុង ចំណោមកូន ហ៊ុន សែន ទាំងបីនាក់នេះ អាចម្នាក់ណាក៏បាន ឬទាំងបីនាក់ក៏បាន មកអង្គុយជជែកដេញដោលគ្នាជាមួយ ខ្មែរ សុវណ្ណភូមិ រួចចាក់ផ្សាយ LIVE ឲ្យពលរដ្ឋខ្មែរបានស្តាប់ និងទស្សនាអំពីគំនិត និងចំណេះពួកយើងដោយតម្លាភាព និងជាក់ស្តែងទាក់ទងនឹងប្រធានបទ សេដ្ឋកិច្ច នយោបាយ កងទ័ព ប្រព័ន្ធគ្រប់គ្រងរដ្ឋ ការទូត ។ល។ បរិបទស្រុកខ្មែរ ឬអឺរ៉ុប ក៏បាន។ ខ្មែរ សុវណ្ណភូមិ នឹងរង់ចាំចម្លើយដោយក្តីរីករាយ និងសង្ឃឹមថាមានអ្នកក្លាហានទៅចុះ។ សូមបញ្ជាក់ថា ការប្រកាសនេះមិនចង់ឈ្នះចង់ចាញ់ ឬដេញជើងអ្វីទេ តែគ្រាន់ចង់ដឹងពីចំណេះពិតរបស់កូន ហ៊ុន សែន ដែលបានអួតប៉ុណ្ណោះ ដោយការវិនិច្ឆ័យត្រូវទុកឲ្យពលរដ្ឋខ្មែរ ឬអ្នកស្តាប់ជាអ្នកសម្រេចចុះ។

ខ្មែសុវណ្ណភូមិបានបញ្ជាក់ថា៖ រឿងល្បិចថោកទាប កាប់ចាក់ លួចជាតិ និងសំលាប់ជាតិសាសន៍ខ្មែរដូចគ្នា ខ្មែរ សុវណ្ណភូមិ សុំមិនហ៊ានប្រកួតទេមិនថាក្នុងការលៈទេសៈណាក៏ដោយ តែបើរឿងចំណេះដឹង ខ្មែរ សុវណ្ណភូមិ មិនខ្លាចប្រកួតឡើយ។

សូមបញ្ជាក់ផងដែរថា កាលពីព្រឹកថ្ងៃទី២៤ ខែកញ្ញាឆ្នាំ ២០១៧ នេះ ក្នុងឱកាសប្រារព្វ ពិធីបិទទ្វារទំនប់វារីអគ្គីសនីសេសាន សម្ដេចហ៊ុនសែន បានផ្ញេីសារដល់អ្នកវិភាគថា មុននឹងវិភាគអ្វីមួយត្រូវ ពិនិត្យរដ្ឋធម្មនុញ្ញជាគោល ព្រោះមានអ្នកវិភាគខ្លះ បកស្រាយបែប ងងឹតងងុល មិនយល់ពីតថភាពច្បាប់ ជាពិសេសការវិភាគមួយជ្រុងដោយមិនយល់ច្បាស់លាស់ថាអ្វីទៅជាតួនាទីរបស់ អង្គនីតិបញ្ញត្តិ និងអង្គនីតិប្រតិបត្តិ ។ ក្នុងការផ្ដាំផ្ញេីនេះទៀតសោត សម្ដេចបានចំអកថា “អស់លោក សមត្ថភាពប៉ុនអស់លោកនេះ មិនបានស្មេីនឹងកូនរបស់ខ្ញុំ» បណ្ឌិតរបស់អស់លោក មិនបានស្មេីនឹងកូនរបស់ខ្ញុំទេ ខ្ញុំសុំប្រដៅ អស់លោកពូកែហេីយ តែអស់លោកមិនមានបណ្ឌិតខាងយោធាទេ វាខុសគ្នាត្រង់កន្លែងនេះ កុំមកចង់លេងជាមួយខ្ញុំជាឪពុក លេងតទល់ជាមួយកូនខ្ញុំទាំង៣ទៅ ពេញចិត្តមួយណាអាចជ្រេីសបាន។”៕

ប្រភព៖ cfapost.com