សុខ គង់ ប្រមាថព្រះមហាក្សត្រនិងបំពានច្បាប់

- September 23, 2017

នេះជាការលើកឡើងរបស់អ្នកច្បាប់និងក្រុមអ្នកវិភាគសង្គមក៍ដូចជាមជ្ឈដ្ឋានប្រជាពលរដ្ឋមួយចំនួន បន្ទាប់ពីអ្នកឧកញ៉ា សុខ គង់ ស្ថាបនិកក្រុមហ៊ុនប្រេងសូគីម៉ិច និងមានក្រុមហ៊ុនជាច្រើនទៀតដូចជាក្រុមហ៊ុនសណ្ឋាគារសុខា ក្រុមហ៊ុនកាត់ដេរគង់ ហុង និងក្រុមហ៊ុនសុខាបូកគោ និងដែលគេស្គាល់ថាមានដើមកំណើតជាជនជាតិយួន និងថ្នាក់ដឹកនាំរបស់ខ្លួនបានសម្រេចដូរឈ្មោះ«រមណីយដ្ឋានឋានសួគ៌បូកគោ» ទៅជា «រមណីយដ្ឋានសុខាឋានសួគ៌» ។

អ្នកច្បាប់និងក្រុមអ្នកវិភាគសង្គមក៍ដូចជាមជ្ឈដ្ឋានប្រជាពលរដ្ឋមួយចំនួនបានចាត់ទុកទង្វើផ្លាស់ប្តូរឈ្មោះ«រមណីយដ្ឋានឋានសួគ៌បូកគោ» ទៅជា «រមណីយដ្ឋានសុខាឋានសួគ៌» ស្ថិតនៅក្នុង«ឧទ្យានជាតិព្រះមុនីវង្សបូកគោ»ពីសំណាក់អ្នកឧកញ៉ា សុខ គង់ ដែលគេស្គាល់ថាមានដើមកំណើតជាជនជាតិយួននិងថ្នាក់ដឹកនាំក្រុមហ៊ុនរបស់លោកថាជាការប្រមាថព្រះមហាក្សត្រ និងបំពានច្បាប់ ព្រោះតែ«ឧទ្យានជាតិព្រះមុនីវង្សបូកគោ»ត្រូវបានបង្កើតឡើងដោយព្រះរាជក្រឹត្យដែលឡាយព្រះហស្ថលេខាដោយអតីតព្រះមហាវីរក្សត្រខ្មែរនរោត្តមសីហនុ(ព្រះបរមរតនកោដ្ឋ)កាលពីឆ្នាំ១៩៩៣ និងបើតាមលោកនាយករដ្ឋមន្ត្រី ការផ្លាស់ប្តូរឈឈ្មោះនេះរាជរដ្ឋាភិបាល និងអាជ្ញាធរគ្រប់លំដាប់ថ្នាក់មិនបានដឹង និងមិនបានអនុញ្ញាត ។

ជាការពិត«អង្រុត»មិនចង់ឃើញនរណាម្នាក់ត្រូវបានសមត្ថកិច្ចចាប់វ៉ៃខ្នោះនិងបញ្ជូនទៅដេកគុកនោះទេ គ្រាន់តែចង់ឲ្យមានការគោរពនិងអនុវត្តច្បាប់ស្មើភាពគ្នាចំពោះមុខច្បាប់ និងចង់ឲ្យប្រទេសដ៍កម្សត់មួយនេះមាននីតិរដ្ឋ និងអធិបតេយ្យជាតិពិតប្រាកដតែប៉ុណ្ណោះ ។

ឧទ្យានជាតិបូកគោត្រូវបានបង្កើតឡើងជាផ្លូវការក្នុងឆ្នាំ១៩៩៣ ហើយបានដាក់បញ្ចូលជាសម្បត្តិបេតិកភណ្ឌឧទ្យានជាតិអាស៊ានក្នុងឆ្នាំ២០០៣ ក្នុងផ្ទៃដីទំហំ១,៤០០គ.ម២ ដោយស្ថិតនៅក្នុងខេត្តកំពត ភាគនិរតីនៃព្រះរាជាណាចក្រកម្ពុជា ។

នៅក្នុងឧទ្យានជាតិនេះ មានកំពូលភ្នំខ្ពស់បំផុតប្រវែង ១០៧៥ម. ត្រូវបានរកឃើញនៅឆ្នាំ១៩១៧ ដោយជនជាតិបារាំងលោក រូលួស ហើយបានអភិវឌ្ឍទៅជារមណីយដ្ឋានក្នុងឆ្នាំ១៩២១។

គួរបញ្ជាក់ជូនផងដែរថា ក្នុងចំណោមឧទ្យានជាតិទាំង១២របស់ព្រះរាជាណាចក្រកម្ពុជា មានតែពីរប៉ុណ្ណោះដែលបានដាក់បញ្ចូលជាសម្បត្តិបេតិកភណ្ឌឧទ្យានជាតិអាស៊ាន នោះគឺឧទ្យានជាតិព្រះមុនីវង្សបូកគោ និងឧទ្យានជាតិវីរជ័យ ៕