បន្ទាប់ពីផ្ទុះការរិះគន់ លោក ហ៊ុន សែន បញ្ជាឲ្យរក្សាឈ្មោះដើម «រមណីយដ្ឋាន ឋានសួគ៌បូកគោ»

(ទីក្រុងប៉ារីស)៖ បន្ទាប់ពីផ្ទុះការរិះគន់យ៉ាងខ្លាំងចំពោះការប្ដូរឈ្មោះ «រមណីយដ្ឋាន ឋានសួគ៌បូកគោ» ទៅជា «រមណីយដ្ឋាន សុខាឋានសួគ៌» នៅព្រឹកថ្ងៃទី២៣ ខែកញ្ញា ឆ្នាំ២០១៧នេះ លោកនាយករដ្ឋមន្ត្រី ហ៊ុន សែន បានបញ្ជាឲ្យរក្សាឈ្មោះដើម «រមណីយដ្ឋានភ្នំបូកគោ» ដោយលោកបានបញ្ជារអោយអភិបាលខេត្តកំពតទៅដកហូតចេញនូវផ្លាកសញ្ញាអត់ច្បាប់ចេញអោយបានមុនម៉ោង ១១ ថ្ងៃនេះ ហើយលោកក៏បានបញ្ជាក់ផងដែរថា តំបន់ប្រវត្តិសាស្ត្រ ត្រូវតែរក្សាឈ្មោះដើមជាដាច់ខាត។

លោកនាយករដ្ឋមន្ត្រី ហ៊ុន សែន បានសរសេររៀបរាប់នៅលើទំព័រហ្វេសប៊ុករបស់លោកយ៉ាងដូច្នេះថា៖ “សូមអរគុណបងប្អូនជនរួមជាតិ ដែលបានអោយខ្ញុំដឹងពីការដូរឈ្មោះរមណីយដ្ឋានភ្នំបូកគោទៅជាឈ្មោះផ្សេង ដែលរាជរដ្ឋាភិបាល និងអាជ្ញាធរគ្រប់លំដាប់ថ្នាក់មិនបានដឹង និងមិនបានអនុញ្ញាត។

ខ្ញុំបានបញ្ជារអោយអភិបាលខេត្តកំពតទៅដកហូតចេញនូវផ្លាកសញ្ញាអត់ច្បាប់ចេញអោយបានមុនម៉ោង ១១ ថ្ងៃនេះ។ តំបន់ប្រវត្តិសាស្ត្រ ត្រូវតែរក្សាឈ្មោះដើមជាដាច់ខាត។”

គួររម្លឹកថា តំបន់រមណីយដ្ឋានភ្នំបូកគោ ត្រូវបានក្រុមហ៊ុនសុខា សម្រេចផ្លាស់ប្តូរឈ្មោះពី «រមណីយដ្ឋានឋានសួគ៌បូកគោ» ទៅជា «រមណីយដ្ឋានសុខាឋានសួគ៌» ចាប់តាំងពីថ្ងៃទី០១ ខែកញ្ញា ឆ្នាំ២០១៧មកម្ល៉េះ។ នេះបើតាមការជូនដំណឹងរបស់ក្រុមហ៊ុន។ តែក្នុងសេចក្តីជូនដំណឹងនោះ ក្រុមហ៊ុនមិនបានបង្ហាញពីមូលហេតុ នៃការផ្លាស់ប្តូរឈ្មោះនេះឡើយ។

ដោយឡែក ក្នុងអំឡុងពេលធ្វើដំណើរទៅលេងកម្សាន្តនៅរមណីយដ្ឋានភ្នំបូកគោនាអំឡុងពេលបុណ្យភ្ជុំបិណ្ឌនេះ ប្រជាពលរដ្ឋខ្មែរបានសម្តែងការភ្ញាក់ផ្អើល និងរិះគន់យ៉ាងខ្លាំង បន្ទាប់ពីបានឃើញស្លាកសញ្ញាស្វាគមន៍នៅខ្លោងទ្វារចូលទៅកាន់ «រមណីយដ្ឋានភ្នំបូកគោ» ដែលប្រជាពលរដ្ឋខ្មែរបានស្គាល់យ៉ាងច្បាស់ ត្រូវបានគេប្តូរទៅជា «រមណីយដ្ឋានសុខា» ជាកម្មសិទ្ធិផ្តាច់មុខក្រុមហ៊ុនសុខា របស់អ្នកឧកញ៉ា សុខ គង់។ ទន្ទឹមការរិះគន់ និងការភ្ញាក់ផ្អើល ប្រជាពលរដ្ឋខ្មែរ ក៏ចង់ឃើញក្រុមហ៊ុនសុខា រក្សាឈ្មោះរមណីយដ្ឋានបូកគោនេះឲ្យនៅដដែល ព្រោះជាឈ្មោះសម្គាល់ទីតាំង រមណីយដ្ឋាន ដែលពលរដ្ឋខ្មែរបានស្គាល់ទូទាំងប្រទេសតាំងពីដើមមក និងជាប់ទាក់ទងយ៉ាងច្រើនជាមួយប្រវត្តិសាស្រ្តខ្មែរ។ លើសពីនេះទៀត ការបំបាត់ឈ្មោះ «រមណីយដ្ឋានភ្នំបូកគោ» ស្មើនឹងការបំបាត់អត្តសញ្ញាណដើមនៃតំបន់រមណីយដ្ឋានទេសចរណ៍នេះផងដែរ៕

ប្រភព៖ cambodiasymbolofchange.com