រិះគន់រឿងភ្លៀង១មេលិចក្រុង ប្រធានស្នើ រដ្ឋមន្ត្រីក្រសួងព័ត៌មាន ដកដំណែងអនុប្រធាន

- September 23, 2017

(ភ្នំពេញ) ៖ ភ្លៀងមួយមេធំនៅថ្ងៃភ្ជុំបិណ្ឌកាលពីថ្ងៃទី២០ ខែកញ្ញា ឆ្នាំ២០១៧ បណ្តាលឲ្យលិចរាជធានីភ្នំពេញយ៉ាងខ្លាំងកន្លងមកនោះ បានក្លាយទៅជាប្រធានបទក្តៅធ្វើអោយអ្នកនិយមលេងនៅលើបណ្តាញសង្គម ហ្វេសប៊ុកចេញមករិះគន់ និងវាយប្រហារយ៉ាងខ្លាំងទៅលើអាជ្ញាធររាជធានីភ្នំពេញ ក៏ដូចជារាជរដ្ឋាភិបាលផងដែរ ។

ការរិះគន់រឿងភ្លៀង១មេលិចក្រុងនេះធ្វើអោយលោក ឃុន សំខាន់ ប្រធានមន្ទីរព័ត៌មានរាជធានីភ្នំពេញ នៅព្រឹកថ្ងៃទី២៣ ខែកញ្ញា ឆ្នាំ២០១៧ បានធ្វើលិខិតស្នើសុំទៅរដ្ឋមន្ត្រីក្រសួងព័ត៌មានលោក ខៀវ កាញារីទ្ធ ដកដំណែងអ្នកស្រី ឃុត សុភាព អនុប្រធានមន្ទីរព័ត៌មានរាជធានីភ្នំពេញ ចេញពីដំណែង ។

នៅក្នុងការស្នើសុំដកដំណែងនេះ ធ្វើឡើងបន្ទាប់ពីអ្នកស្រី ឃុត សុភាព អនុប្រធានមន្ទីរព័ត៌មានរាជធានីភ្នំពេញបានបង្ហោះ សាររិះគន់ នោះលើគណនីហ្វេកបុកផ្ទាល់ បន្ទាប់ពីមានភ្លៀងធ្លាក់ជោកជាំធ្វើឲ្យតំបន់មួយចំនួននៅក្នុងក្រុងភ្នំពេញ ត្រូវជន់លិចនោះ ។

នៅក្នុងសារអ្នកស្រី ឃុត សុភាព បានសសេរអមដោយរូបភាពលិចទឹកផង លើកឡើងថា « ពិតជាមានមោនភាពណាស់ ដែលកើតជាខ្មែរ ទៅក្រៅប្រទេស ម្តងៗ ស្ទើរតែមិនហ៊ានថាមកពីណា ហើយជនជាតិអី ។ នេះគ្រាន់តែភ្លៀងត្រឹម តែ២ម៉ោងទេ ។ សូមជាតិណាៗកុំឲ្យកើតជាខ្មែរ ព្រោះមិនចង់មានមោនភាពទេ » ៕