នាយគ្រឿន ចំអកចំៗថាមានតារាខ្លះ ស៊ីលុយថ្លៃតែចរិកថោក

- October 22, 2017

ក្រោយប្រឡូកនឹងវិស័យសិល្បៈ និងបានវិវត្តខ្លួនពីតារាកំប្លែង មកជាតារាសម្តែង និងជាអ្នកនិពន្ធដឹកនាំរឿង នាយគ្រឿន ថាខ្លួនបានជួបនឹងរឿងរ៉ាវជាច្រើន ជាមួយនឹងសិល្បករ។

អ្វីដែលធ្វើឲ្យលោកបាញ់បោះ ពាក្យមិនពិរោះត្រចៀកនោះ គឺក្រោយពេលដែលតារាសម្តែងប្រុសស្រីល្បីឈ្មោះខ្លះ ទាមទារតម្លៃខ្លួនខ្ពស់តែមិនធ្វើចរិក ឲ្យថ្លៃថ្នូរដូចតម្លៃខ្លួន។

នាយគ្រឿន បានប្រកាសលើឆាកតន្ត្រី ក្នុងថ្ងៃប្រកាសបើកសម្ពោធ ចាក់បញ្ចាំងស្នាដៃភាពយន្តរឿង ”ថតកុន” ដែលលោកបានសម្តែង និពន្ធ និងដឹកនាំសម្តែង។ នៅពីមុខសិល្បករជាច្រើនរូប តារាកំប្លែងរូបនេះបាញ់ចំៗថា “តារាខ្លះស៊ីលុយថ្លៃ ប៉ុន្តែចរិកថោក”។

លោកលើកឡើងដូចនេះ ព្រោះតែសិល្បករនោះ មិនគោរពតម្លៃខ្លួន ពិសេសទាក់ទិននឹងការ មិនគោរពពេលវេលា ដោយសំអាងតែខ្លួនល្បីហើយ ទុកឲ្យសិល្បករដទៃចាំជាច្រើននាក់។

ក្រៅពីបញ្ហាដែលលើកឡើង ពីការមិនគោរពពេលវេលារបស់តារាល្បីមួយចំនួន លោកក៏ជួបនឹងរឿងហួសចិត្តជាច្រើន ដែលរហូតធ្វើឲ្យលោកសម្រេចចិត្ត ចងក្រងជាភាពយន្តមួយឡើង។

ជុំវិញបញ្ហាមិនគោរពពេលវេលារបស់សិល្បករ ធ្លាប់បានក្លាយជាប្រធានបទ និងបញ្ហាឈឺក្បាលរបស់ផលិតករមួយចំនួន ដែលពេលខ្លះត្រូវឲ្យសិល្បករដទៃចាំ និងពេលខ្លះត្រូវរំសាយការថត ព្រោះតែតារាសំខាន់អវត្តមាន៕