ធី សុវណ្ណថា គ្រោងប្ដឹងមេឃុំបក្សសង្រ្គោះជាតិជាង៥០០នាក់ដាក់គុក ដោយសារមិនព្រមចុះចូលបក្សប្រជាជន

សកម្មជនគណបក្សប្រជាជនកម្ពុជា កញា ធី សុវណ្ណថា បានចោទប្រកាន់ទៅលើមេឃុំមកពីគណបក្សសង្រ្គោះជាតិប្រមាណជាជាង៥០០នាក់ថា បានចូលរួមប្រព្រឹត្តទង្វើក្បត់ជាតិ ។ បើតាមកញ្ញា ធី សុវណ្ណថា បានបញ្ជាក់អោយដឹងថា ការសម្រេចគ្រោងប្ដឹងមេឃុំមកពីគណបក្សសង្រ្គោះជាតិទាំង៥០០នាក់នៅទូទាំងប្រទេសនេះ ដោយសារតែក្រុមមេឃុំទាំងនេះមិនព្រមមកចុះ ចុលជាមួយនឹងរដ្ឋាភិបាលគណបក្សប្រជាជន តាមការប្រកាសបើកផ្លូវពីលោកនាយករដ្ឋមន្រ្តី ហ៊ុន សែន ដែលជាប្រធាននៃគណបក្សកាន់អំណាចមួយនេះ ។

កញ្ញា ធី សុវណ្ណថា ដែលជាសកម្មជនហ្វេសប៊ុកធ្លាប់មានឈ្មោះល្បីដោយសារគាំទ្រគណបក្សសង្រ្គោះជាតិកន្លងមកនោះបានថ្លែងលើកឡើងទៀតថា រហូតមកទល់នឹងពេលនេះ កញ្ញាកំពុងតែ ធ្វើការពិភាក្សា និងកំពុងសិក្សាផ្លូវច្បាប់ដើម្បីដាក់ពាក្យប្ដឹងមេឃុំទាំង៥០០នាក់នេះ ៖ « នាងខ្ញុំ ធី សុវណ្ណថា នឹងសិក្សាច្បាប់ ដើម្បីប្តឹងមេឃុំ ជំទប់ឃុំ ក្រុមប្រឹក្សាឃុំ ពីបក្សសង្គ្រោះជាតិ ជាង៥០០០នាក់ ទៅតុលាការពីបទ “ចូលរួមក្បត់ជាតិ” តាមគំរូប្រទេសតួគី ដែលទើបតែចាប់ជនក្បត់ជាតិ ជាង៥ម៉ឺននាក់ ដាក់គុក... »

នៅលើទំព័រគណនីបណ្ដាញសង្គមហ្វេសប៊ុករបស់កញ្ញា ធី សុវណ្ណថា កាលពីថ្ងៃទី១១ វិច្ឆិកា ម្សិលមិញនេះ បានចោទប្រកាន់មេឃុំមកពីគណបក្សសង្រ្គោះជាតិទាំង៥០០នាក់ថា ជាក្រុមថោកទាប ពីព្រោះអ្នកទាំងនោះមិនព្រមមករួមរស់ជីវភាពនយោបាយជាមួយនឹងបក្សប្រជាជន ។ សកម្មជនបក្សប្រជាជនរូបនេះបានអះអាងថា ទង្វើទាំងនេះ គឺប្រៀបបានទៅនឹងការចូលរួមប្រព្រឹត្តទង្វើក្បត់ជាតិជាមួយនឹងលោក កឹម សុខា ដែរ ។ កញ្ញា អោយដឹងបន្ថែមបែបនេះ ៖ មន្ត្រីឃុំCNRP “ថោកទាបណាស់”ព្រោះតែផលប្រយោជន៍បក្ស សុខចិត្តក្បត់ឆន្ទ:ប្រជាជន ដែលប្រជាជនខំបោះឆ្នោតជូន ដើម្បីឲ្យពួកអស់លោក បំរើប្រជាជន ជួយការពារប្រជាជន មិនមែនបំរើបក្សទេ ។

ថ្ងៃក្រោយពេលរាស្ត្រមានទុក្ខលំបាក ពួកអស់លោកក៏គ្មានតំណែង តើពួកអស់លោកជួយរាស្ត្របានទេ?ព្រោះតែចង់រក្សាឈ្មោះជា “អ្នកស្នេហាជាតិ” បែរជាពួកអស់លោកមិនព្រមរក្សាតំណែង ដើម្បីជួយបំរើជាតិបំរើការពារប្រជាជន នេះរឺអ្នកស្នេហាជាតិ? សូមពិចារណា ពួកអស់លោកនៅតែគាំទ្រ និងចូលរួមជាមួយCNRP នេះបញ្ជាក់ថា ពួកអស់លោកក៏ចូលរួម “ក្បត់ជាតិ” ដែរ » ។ សូមជម្រាបថា ចាប់តាំងពីមានការអំពាវនាវពីលោកនាយកដ្ឋមន្រ្តី ហ៊ុន សែន អោយសមាជិករបស់គណបក្សប្រឆាំងចុះចូលមក មន្រ្តីរបស់គណបក្សសង្រ្គោះជាតិបានអះអាងថា មានសមាជិកត្រឹមតែ ជាង៤០រូបប៉ុណ្ណោះដែលបានលាលែងចេញពីគណបក្សសង្រ្គោះជាតិ នឹងទៅចុះចូលជាមួយនឹងបក្សប្រជាជន ។ ប៉ុន្តែសារព័ត៌មានគាំទ្ររដ្ឋាភិបាលបែជាចុះផ្សាយថា មានចំនួនជាង១០០នាក់ទៅហើយ ៕

ប្រភព៖ cambopostnews