ភ្នំពេញ ៖ ក្រោយបញ្ចប់ការសួរនាំនៅរសៀលថ្ងៃទី១១ មករា ២០១៨ នេះលោក សៀង សុខ ព្រះរាជអាជ្ញារងអមសាលាដំបូងរាជធានីភ្នំពេញ បានសម្រេចចោទប្រកាន់ចំនួន២បទល្មើស ទៅលើមន្ត្រីនគរបាលពាក់ស័ក្តិ៤ ដែលធាក់មន្ត្រីនគរបាលចរាចរណ៍ជាប់កិច្ចសន្យាម្នាក់របស់សាលារាជធានីភ្នំពេញ ។
លោក សៀង សុខ បានសម្រេចចោទប្រកាន់ទៅលើជនត្រូវចោទចំនួន២បទល្មើស មានទី១ «ហិង្សាដោយចេតនាមានស្ថានទម្ងន់ទោស» តាមបញ្ញត្តិមាត្រា២១៨ នៃក្រមព្រហ្មទណ្ឌ ត្រូវប្រឈមជាប់ពន្ធនាគារពី២ឆ្នាំទៅ៥ឆ្នាំ ពិន័យជាប្រាក់ពី៤លាន ទៅ១០លានរៀល ។ និងបទល្មើសទី២ «ប្រើប្រាស់ដោយគ្មានសិទ្ធិនូវសញ្ញាសម្គាល់ ដែលកំណត់ដោយអាជ្ញាធរសាធារណៈ» តាមបញ្ញត្តិមាត្រា៦១៤ នៃក្រមព្រហ្មទណ្ឌ ដែលប្រឈមជាប់ពន្ធនាគារពី១ខែ ទៅ១ឆ្នាំ ពិន័យជាប្រាក់ពី ១០ម៉ឺន ទៅ២លានរៀល ។
ប្រភពពីមន្ត្រីតុលាការ បានបញ្ជាក់អោយដឹងថា តាមពិតជនត្រូវចោទរូបនេះ មានឋានន្តរស័ក្តិអនុសេនីយ៍ឯក (ស័ក្តិ៣) ប៉ុន្តែជននេះ បានទិញស័ក្តិក្លែងក្លាយ១ទៀត ដើម្បីពាក់លើស្មា គឺឡើងស័ក្តិ៤ ។
ក្រោយសម្រេចចោទប្រកាន់ទៅលើជនត្រូវចោទចំនួន២បទល្មើសរួចមកលោក សៀង សុខ បានបញ្ជូនទៅកាន់ដៃចៅក្រម ដើម្បីចាត់ការបន្តទៀត តើសម្រេចឃុំឬមិនឃុំ ?
លោកស័ក្តិ៣ ទិញស័ក្តិ៤ ត្រូវគេបានស្គាល់ថា ឈ្មោះ សៅ បញ្ញា អាយុ៣៣ឆ្នាំ មានទីលំនៅផ្ទះលេខ៤៦ងអា ផ្លូវ២៧១ សង្កាត់ទួលទំពូង២ ខណ្ឌចំការមន បម្រើការងារនៅការិយាល័យរដ្ឋបាលសរុបនៃនាយកដ្ឋានប្រឆាំងបទល្មើសបច្ចេកវិទ្យានៃអគ្គស្នងការដ្ឋាននគរបាលជាតិ ។ ចំណែកជនរងគ្រោះក្នុងអំពើហិង្សានោះឈ្មោះ អឿន ចំណាន ភេទប្រុស អាយុ២៥ឆ្នាំ មានទីលំនៅភូមិព្រែកល្វា ឃុំពញាឮ ស្រុកពញាឮ ខេត្តកណ្តាល ជាមន្ត្រីជាប់កិច្ចសន្យា នៃការិយាល័យនគរបាលចរាចរណ៍ផ្លូវគោក ។
បើតាមមន្ត្រីនគរបាលព្រហ្មទណ្ឌ ដែលបានសាកសួរជនជាប់ចោទផ្ទាល់ បានបង្ហើបប្រាប់ឲ្យដឹងថា ដើមចមដែលបណ្តាលឲ្យមានការចាប់ខ្លួននេះ កាលពីព្រឹកថ្ងៃទី៨ មករា ២០១៨ លោកស័ក្តិ៣ក្លែងស័ក្តិ៤ សៅ បញ្ញា ក្នុងសម្លៀកបំពាក់ស៊ីវិល បានជិះរថយន្តមួយគ្រឿង ត្រឡប់មកពីផ្ទះឪពុក ដែលស្ថិតនៅសង្កាត់គីឡូម៉ែត្រលេខ៦ ខណ្ឌឫស្សីកែវ លុះបើកមកទៅដល់ចំណុចភ្លើងស្តុបត្រឡោកបែក សង្កាត់ភ្នំពេញថ្មី ខណ្ឌសែនសុខ ត្រូវបាននគរបាលចរាចរណ៍ឃាត់ ដោយលោកស័ក្តិ៣រូបនោះ បើកបររថយន្តមិនគោរពច្បាប់ចរាចរណ៍។
នៅពេលនគរបាលចរាចរណ៍ ដែលក្នុងចំណោមនោះក៏មានមន្ត្រីជាប់កិច្ចសន្យាម្នាក់ បានឃាត់រថយន្តនោះ ដើម្បីធ្វើការផាកពិន័យតាមផ្លូវច្បាប់ចរាចរណ៍ ។ ពេលឃាត់នោះលោកស័ក្តិ៣ មិនព្រមចេញពីរថយន្តទេ និងបានប្រើពាក្យសម្តីមិនសមរម្យលើសមត្ថកិច្ចចរាចរណ៍ទៀតផង ហើយថែមទាំងបិទកញ្ចក់រថយន្តវិញ និងបម្រុងវិលកង់បើកចេញទៅមន្ត្រីប៉ូលិសចរាចរណ៍ជាប់កិច្ចសន្យាបានបន្លឺពាក្យថា «មនុស្សឈ្លើយអ៊ីចឹងបានតែត្រូវក្បាលមួយអាយឌី» ។
ពាក្យសម្តីនេះបានធ្វើឲ្យលោកសក្តិ៣នោះឆេះដុំ និងងាកមកតបវិញថា មិនអីទេហែ្អង…! រួចក៏បើករថយន្តយ៉ាងលឿនបោះពួយចេញពីគោលដៅនោះបាត់ទៅ ។
លុះថ្ងៃទី៩ មករា ស្អែកឡើងលោកសក្តិ៣ សៅ បញ្ញា ក្នុងឯកសណ្ឋានប៉ូលិល ទំនងទើបចេញពីធ្វើការបានជិះរថយន្តម៉ាកហ្វត ពណ៌ស ពាក់ស្លាកលេខភ្នំពេញ 2AT 9099 ជិះទៅអែបលើចិញ្ចើមផ្លូវគោលដៅភ្លើងស្តុបត្រឡោកបែកនោះ រួចហើយបានចុះពីរថយន្ត ដើរសំដៅទៅរកប៉ូលិសចរាចរណ៍ ដែលកំពុងឈរជើងសម្រួលចរាចរណ៍ ចាប់ក្របួចកអាវពីក្រោយ រុញចូលក្នុងយានដ្ឋានមួយដែលនៅក្បែរនោះ រួចធ្វើសកម្មភាពវាយទៅលើជនរងគ្រោះ អឿន ចំណាន មួយដៃ បណ្តាលឲ្យជ្រុះវិទ្យុទាក់ទងមកដី ។
ភ្លាមនោះ លោក អឿន ចំណាន បានលុតជង្គង់លើកដៃគោរពសុំទោស ព្រោះឃើញពាក់ឯកសណ្ឋាននគរបាលមានសក្តិ៤ ។ ទោះជាមានការអង្វករយ៉ាងណាក៏ដោយ លោកសក្តិ៣ សៅ បញ្ញា បញ្ជាឲ្យជនរងគ្រោះលុតជង្គង់សំពះរួចហក់ធាក់មួយជើងចំដើមទ្រូង បណ្តាលឲ្យឈ្មោះ អឿន ចំណាន ខ្ទាត់ទៅក្រោយ ។ ឃើញដូច្នោះមន្ត្រីនគរបាលចរាចរណ៍ដែលឈរនៅគោលដៅជាមួយគ្នា បានឃាត់ បានអង្វរសុំកុំធ្វើបាបអី… ព្រមទាំងបានធ្វើការសម្របសម្រួលគ្នា ទើបស័ក្តិ៣ សៅ បញ្ញា ឡើងជិះរថយន្តបើកចេញ យ៉ាងក្រអឺតក្រទមទៅបាត់តែម្តងទៅ ។
ក្រោយកើតហេតុ ស្រាប់តែបណ្តាញសង្គមហ្វេសប៊ុកក្នុងស្រុក បានបង្ហោះរូបភាព និងសកម្មភាព ដែលថតចេញពីកាមេរ៉ាសុវត្ថិភាពដាក់តាមផ្លូវសាធារណៈយ៉ាងព្រោងព្រាត បានធ្វើឲ្យមានការភ្ញាក់ផ្អើល ។ ស្របពេលនោះលោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ បានបញ្ជាទៅនាយឧត្តម សេនីយ៍ ជួន សុវណ្ណ អគ្គស្នងការរង និងជាស្នងការនគរបាលរាជធានីភ្នំពេញស្តីពីរឿងអាស្រូវនេះ ក៏មានបទបញ្ជាឲ្យទាក់ទងទៅលោកស័ក្តិ៣ សៅ បញ្ញា ឱ្យចូលបំភ្លឺនៅការិយាល័យនគរបាលចរាចរណ៍ផ្លូវគោករាជធានីភ្នំពេញ លើករណីប្រើហិង្សាដោយចេតនានេះ ។
ក្រោយពីសាកសួរទៅឃើញថា នោះជាបទល្មើសព្រហ្មទណ្ឌជាក់ស្តែង ជនសង្ស័យឈ្មោះ សៅ បញ្ញា ត្រូវបានចាប់វាយខ្នោះដៃទៅក្រោយបញ្ជូនទៅតុលាការ ដើម្បីចាត់ការតាមនីតិវិធី ។
សូមបញ្ជាក់ថា ពាក្យបណ្តឹងជនរងគ្រោះ ត្រូវបាននគរបាលចរាចរណ៍ធ្វើការដាច់ដោយឡែកដាក់ចូលតុលាការ ដូច្នោះពុំទាន់ដឹងថា ជនរងគ្រោះទាមទារយ៉ាងណានោះទេ ៕
ប្រភព៖ angrut
Comments
Post a Comment