គ្រូសូត្រស្តាំវត្តស្វាយជ្រំ ត្រូវចាប់ផ្សឹកហើយ ក្រោយឆាន់ស្រីស្រស់ ៥ឆ្នាំជាប់គ្នា

- April 11, 2018

កណ្តាល៖ អំឡុងឆ្នាំ២០១៣ នាង ប រ ទើបនឹងមានអាយុ១៣ឆ្នាំ រៀនថ្នាក់ទី៧ នៃអនុវិទ្យាល័យស្វាយជ្រំ នាងត្រូវបានព្រះគ្រូសូត្រស្តាំព្រះនាម លន់ សុវណ្ណដា បានប្រើនាងឲ្យទៅទិញបបរមកព្រះគេនព្រះអង្គឆាន់។ បន្ទាប់ពីឆាន់បបររួច សង្ឃកំហួចអង្គនោះ បានបិទទ្វារបន្ទប់កុដិរបស់ព្រះអង្គជិត ហើយបានលួងលោម និងចាប់នាងសេពមេថុនធម្ម (រួមភេទ) រហូតបានសម្រេច នៅក្នុងកុដិនោះ។

បន្ទាប់មកទៀត ព្រះសង្ឃបារាជិកអង្គនោះ បានលួងលោមនាង ដោយប្រើសម្ដីដ៏ផ្អែមល្ហែម កុំឲ្យនាងយករឿងអាស្រូវទាំងនោះប្រាប់គេឯង ដោយព្រះអង្គសន្យាថា នៅពេលលាចាកសិក្ខាបទ (សឹក) ព្រះអង្គនឹងចូលស្តីដណ្តឹងនាងរៀបការ តាមប្រពៃណី យកគ្នាធ្វើជាប្ដីប្រពន្ធ។ ក្រោយមកអ្នកទាំង២ ចេះតែមានទំនាក់ទំនងស្នេហាជាមួយគ្នា សេពមេថុនធម្មជាញយៗ។

លុះស្រីស្រស់រូបស្អាតរង់ចាំអស់ ៥ឆ្នាំមកហើយ សង្ឃអង្គនោះមិនព្រមសឹកឡើយ តែបែរជាលួចមានស្រីថ្មី មិនព្រមលើកទូរស័ព្ទនាង បម្រុងដោះដៃ ទើបធ្វើឲ្យនាងចុកចាប់ក្នុងប្រាណរហូតរត់ទៅប្តឹងសមត្ថកិច្ចតែម្តង។ កាលពីម្សិលមិញ ថ្ងៃទី១០ មេសា ព្រះមេគណខេត្តកណ្ដាល ព្រះអនុគណស្រុកខ្សាច់កណ្ដាល និងមន្ត្រីធម្មការខេត្ត បានចុះទៅដល់វត្តស្វាយជ្រំ ឃុំស្វាយជ្រំ ស្រុកខ្សាច់កណ្ដាល ហើយបានចាប់ផ្សឹកព្រះគ្រូសូត្រស្ដាំកំហូចអង្គនោះហើយ។